Aizawl : ZPM Thalai Vice President Dr. C. Lalrammawia chuan, "Luhna tlak loh politics kan tih hi, chhuahsan tlak loh politics a ni zawk,"  tiin thalaite ram siamtha turin politics lam an luhchilh mek tih a sawi.

Dr. Mawitea chuan, "Hun kaltaah chuan pawn atangin Mizoram politics bawlhhlawhzia kan sawi a,  mahse, chu politics lakah chuan inserhhran tumin, hlat tum teh mah ila, politics hian kan khawtlang, kohhran, chhungkua leh mimal nun min luhchhuah tho tho tih hriatfiahna mipuiin kan nei nasa ta hle. Zoram politics-ah harhtharna a thleng mek a, thalaite pawhin kan ram tihchhiatna atana tha ber chu politics a ni a, kan ram siamthatna atana tha ber pawh politics tho a ni tih hriain a him chinah kan tawm thei tawh bik lova, ram siamtha turin kan zuang chhuak mek a ni," a ti. 

College Veng ZPM Unit-in Political Training leh mi thar lawmluhna hun Park Eden, Falkland-ah an hmanah hian Dr. Mawitea chuan, "Kalphung thar hi a awm tak tak em? tih hi Zoram politics-a thu inchuh lian tak a ni. MNF leh Congress hi party hran daih ni mah se, an kalphungah chuan chhul khat chhuak, a kung hran anga lang si, a zung erawh in phanzawm ang hi an ni a, Sem Policy hmanga Zoram mipui tam tak ngaihtuahna ti piangsualtute an ni. Heng party-ah hian mi tha leh ram veitu tam tak an awm mah se, an party kalphung hlui nghet takah hian hnim hlingnei hmuna to angin dip ralin an awm thin. Kalphung thar a awm chuang lo titute hi Zoram mipuiin kalphung thar an hmu ang tih hlau bertute an ni hial ang,” tiin MNF leh Congress chuchanga a hmuh dan a sawi. 

ZPM-ah mipuiin beiseina thar an nei nia a hriat thu a sawi a, party dang atang leh political party-a la inhnamhnawih lo mi \ha tak takten ZPM an rawn zawm mek a zel tiin, kalphung tharah chuan langtlang, rintlak, hmasawnnaa hmangchang hria, rethei leh chanhaite tlukluha ngamna sorkarna siam turin an bei mek niin a sawi a. Chutiang ram rorelna siam thei tur chuan ZPM-a awmte hian Kalphung Thar hi eng nge a nih leh, Kalphung Thar duhtu kan ni takzet em? tih an inzawh nawn fo tul a tih thu a sawi bawk.